Ցեղասպանության 100-րդ տարելիցի միջոցառումների շրջանակներում Շիրակի մարզի Մարալիկ քաղաքում բացվեց Սողոմոն Թեհլերյանի արձանը: Վրիժառու հայորդու 4 մետրանոց պղնձաձույլ կոթողը տեղ գտավ Մարալիկի հրապարակում, քանդակագործը գյումրեցի Սամվել Պետրոսյանն է, ով Թեհլերյանին կերտել է զենքը ձեռքին, իսկ ոտքի տակ ինչ-որ բան: Շատերը դա մեկնաբանում են որպես Թալեաթ փաշայի գլուխը, ինքը՝ քանդակագործը, այն ժայռ է համարում:

ՙԷսքիզներում նաև գլխի տարբերակն է եղել, բայց վերջում ժայռը մնաց: Իսկ ժողովուրդն ինչպես ուզում է, կարող է մտածել, այստեղ գլխավորը մեր վրիժառուն է, թե նրա ոտքերի տակ Թալեաթը կլինի, քար, թե մեկ ուրիշ բան, էական չէ՚, - նշում է քանդակագործը:

ՙՈւղիղ մեկ դար է անցել պատմական այն դաժան ժամանակաշրջանից, որբ իրագործվեց Հայոց ցեղասպանությունը: Թուրքերի կողմից ոչնչացվեց շուրջ 1.5 միլիոն հայ: Հայը կորցրեց իր հողերի մեծ մասը, դարձավ տարաբախտ, տարածվեց աշխարհով մեկ, բայց նա կարողացավ ծիլեր արձակել, հզորանալ և հասնել մեր օրերը: Իհարկե, հայը չէր կարող անպատասխան թողնել թուրքերի ոճրագործությունը: Եվ այդ հայ զավակը Սողոմոն Թեհլերյանն էր, ով 1921թ. Գերմանիայում, դիմահար կրակոցով գնդակահարեց Հայոց ցեղասպանության գլխավոր մասնակից Թալեաթին, ով պետք է պատասխան տար 1,5 միլիոն անմեղ զոհերի համար, և նրանց այն տրվելիք ծիլերի, որոնք կարող էին այս մեկ դարի ընթացքում դառնալ գուցե 15 միլիոն՚, - ելույթի իր խոսքում նշեց Մարալիկի քաղաքապետ Արտակ Գևորգյանը: